უილიამ მარჩის რომანი განსაკუთრებით სულისშემძვრელი იქნება მშობლებისთვის, რომლებიც საკუთარი შვილის განვითარებასა და პიროვნებად ჩამოყალიბებას ყოველდღიურად აკვირდებიან. რა მოხდება თუ სიყვარულით სავსე ოჯახში გაზრდის მიუხედავად, ბავშვს თანდაყოლილი ნაკლი აქვს, მანკიერი თესლი, რომელსაც კეთილგანწყობილი გარემოთი ვერ შეცვლი და ადრე თუ გვიან საშინელი ფორმით გამოვლინდება. ეს კითხვა ავტორმა საკუთარ თავს ორმოცდაათიან წლებში დაუსვა, პასუხი კი მკითხველისთვის მისი გარდაცვალებიდან ერთ თვეში, 1954 წელს გახდა ცნობილი. „მანკიერი თესლი“ არა მხოლოდ თავისი დროისთვის იყო კომერციულად და კრიტიკულად წარმატებული, არამედ ათწლეულების განმავლობაში შეინარჩუნა გავლენა. ამაზე ბროდვეიზე დადგმული შოუ, ოსკარზე ნომინირებული ფილმი, თუ მისი გავლენით დაწერილი ათობით რომანი მეტყველებს.