აფხაზეთის ომის თემა რამდენადაც აქტუალურია, იმდენად სათუთიცაა. ეს ის სატკივარია, რომელიც დროდადრო გვაფხიზლებს და გვახსენებს, რომ ჩვენს თაობას დიდი ტვირთი აწევს - პასუხისმგებლობა აფხაზეთისა და ცხინვალის რეგიონის დაკარგვის გამო. სწორედ ეს პასუხისმგებლობა გვავალებს წართმეული ტერიტორიების დაბრუნებასაც. ამის წინაპირობა კი ის უამრავი პასუხგაუცემელი შეკითხვაა, რომელის გამოაშკარავება აუცილებლობას წარმოადგენს. ბევრ რამეს უნდა აეხადოს ფარდა, მათ შორის: კონკრეტულად რამ გამოიწვია აფხაზეთში კონფლი8ქტის იმგვარი ესკალაცია, რომ ომი თავიდან ვერ ავიცილეთ? ვისი, რისი გამოისობით, რატომ დავმარცხდით? ვინ და რატომ, რის ფასად დაუთმო მტერს ქართული მიწაწყალი? შეგვეძლო თუ არა, თუნდაც მისი ნაწილის შენარჩუნება? და საერთოდ, რა ხდებოდა აფხაზეთში ომის მიმდინარეობისას?...