ადიტა - თაგვების სწორუპოვარი დედოფალი (ახალი ლეგენდები ინდოეთზე - I ნაწილი-მზის დინასტია)

ინდოელები ბევრ წეს–ჩვეულებას საუკუნეების მანძილზე უცვლელად ინარჩუნებენ და ისევე ასრულებენ, როგორც მათი წინაპრები. ინდოელებს აქვთ ერთი ტრადიცია, რომელსაც ზედმიწევნით მკაცრად იცავენ და რომლის თანახმადაც არც ერთი სულიერის მოკვლა არ შეიძლება. გარდა ამისა, შეიძლება თაყვანსაც კი სცემდნენ ამა თუ იმ ცხოველს. ხშირად ეს ცრურწმენასთან არის დაკავშირებული, რასაც რეალობასთან კავშირი ნამდვილად არა აქვს, თუმცა თვითონ ის ფაქტი, რომ ცხოველები დაცულები არიან, ეს უკვე მნიშვნელოვანი ანგარიშგასაწევი მოვლენაა. ერთ–ერთი ასეთი უძველესი გადმოცემის თანახმად, თეთრი თაგვი საკულტო ცხოველად ითვლება და ამიტომ დიდ პატივს მიაგებენ. ათასობით თაგვი სპეციალურად მათთვის აგებულ ტაძარში ბინადრობს და მათ არავინ ერჩის, პირიქით, თუ მათ შორის თეთრი ფერის გამოერევა, ის უმალ განსაკუთრებული თაყვანისცემის საგნად იქცევა.