წიგნს ერთვის სოფო კირთაძის ილუსტრაციები. შვეიცარიელი მწერალი და პუბლიცისტი პეტერ ბიქსელი დაიბადა 1935 წლის 24 მარტს ლუცერნში. ადრეულ ასაკშივე აქვეყნებდა ლექსებსა და მოთხრობებს ჟურნალ-გაზეთებში. აღიარება და რამდენიმე პრესტიჟული ლიტერატურული პრემია მოუტანა 1964 წელს გამოცემულმა მოთხრობების კრებულმა ფრაუ ბლუმი, კაცმა რომ თქვას, სიამოვნებით გაიცნობდა მერძევეს. 21 მინიატურისგან შემდგარ ამ პატარა წიგნში ავტორი უაღრესად სადად, ლაკონიურად, ზოგჯერ თითქოს გულუბრყვილოდაც კი გვესაუბრება განზომილებითა და მასშტაბით ჭეშმარიტად ეპიკურ თემებზე: გაუცხოებასა და მარტოობაზე, ბედნიერებასა და სიბერეზე, სიყვარულსა და სიძულვილზე...