წინათქმა "მოგზაურობა შოთას სამყაროში", ასე ჰქვია ამ ელექტრონულ წიგნ-სახელმძღვანელოს, რომლის ძირითადი სამიზნეები უფროსკლასელი მოსწავლეები და ჰუმანიტარული პროფილის სტუდენტები არიან; თუმცა, ჩემი ვარაუდით, არც სხვათათვის უნდა იყოს იგი უინტერესო და ურგები, მათ შორის - ხანდაზმულთათვისაც. ამის მიზეზი, პირველ ყოვლისა, წიგნის შინაარსობრივი მხარეა - იგი მიზნად ისახავს "ვეფხისტყაოსნის" უკიდეგანო სიღრმესა და სიმაღლეს აზიაროს მკითხველი, ახალგაზრდა იქნება იგი თუ "ძველგაზრდა"; როგორც ყველა გენიალური მხატვრული ნაწარმოები, "ვეფხისტყაოსანი" საბავშვო წიგნიც გახლავთ და "სადიდოც", ამიტომაც არის მისდამი ინტერესი საყოველთაო.
წიგნი რვა კარისგან შედგება; მათგან ექვსს ქვესათაურად და ერთგვარ გზისმკვლევად უძღვის ამ კარის შინაარსთან მისადაგებული აფორიზმი, ზოგს - მოკლე ფრაგმენტიც ტექსტისა.
ამ ახალ ელექტრონულ წიგნში გამოვიყენე ჩემი მრავალწლიანი სატელევიზიო გამოსვლების (1975 წლიდან მოკიდებული - დღევანდლამდე) მხოლოდ ფრაგმენტები, ვინაიდან, ჯერ ერთი, ჩემს გადაცემებს ტელევიზია, ჩვეულებრივ, პირდაპირი ეთერით უჩვენებდა და - მეორეც, რასაც იწერდა, ის მწირი მასალაც სატელევიზიო არქივებმა სრულად ვერ შემოინახეს.
