თავი I - მშობლიური ადგილები ხელჯოხზე დაყრდნობილი მამაკაცი, მუქი თმით, შეღებილი წარბებით, თავზე შლაპით, მოკლე ულვაშით, წელში გამოყვანილი პიჯაკით, დიდი შარვლითა და უზარმაზარი ცხვირაწეული ფეხსაცმლით - ასე გამოიყურებოდა ჩარლი ჩაპლინის „ მაწანწალა “ , რომელმაც მსოფლიო მოიარა და ყველგან, ნებისმიერი ქვეყნის კინოდარბაზში, მისაღებ და სასურველ სტუმრად იქცა. ის სრულიად მსოფლიომ შეიყვარა.
გასული საუკუნის კომიკოსებისა და კლოუნების შემოქმედებაში, არაერთი „ მაწანწალის “ სახეს შეხვდებოდით, თუმცა დღევანდელობას მხოლოდ ჩარლი ჩაპლინის სახელი შემორჩა, ვინაიდან დანარჩენებს არ ჰქონდათ ჩაპლინისეული ხიბლი, ნებისმიერი აზრისა და გრძნობის პანტომიმით გადმოცემის განსაკუთრებული უნარი, რისი წყალობითაც ჩარლი ჩაპლინის სახე განუმეორებლად დარჩა კინოს ისტორიაში.
„ მისი ფილმები ყოველთვის გაგვაცინებს, 100 წლის შემდეგაც კი “ , - ამბობს ვუდი ალენი და ჩვენც დარწმუნებულნი ვართ მისი სიტყვების ჭეშმარიტებაში. გვჯერა, რომ ჩარლი ჩაპლინის იუმორს დრო ვერასდროს გაახუნებს.
სერ ჩარლზ სპენსერ ჩაპლინი (უმცროსი) - ადამიანი, რომელმაც თავისი შემოქმედებით მსოფლიო შეცვალა. მან კინოს თავისი განუმეორებელი ფერები შესძინა... რომ არა ის, კინო ალბათ სულ სხვანაირი იქნებოდა...
„ ოლიმპიკზე “ მხიარული განწყობა სუფევდა. ამერიკის შეერთებული შტატებიდან ინგლისში მიმავალ ამ ხომალდზე მგზავრებს შორის ჩაპლინის ორეულთა კონკურსი ტარდებოდა. იმხანად გართობის პოპულარულ სახეს წარმოადგენდა მსგავსი სახის შეჯიბრებები, თუმცა ეს კონკურსი იმით განსხვავდებოდა დანარჩენებისგან, რომ მისი ინიციატორი „ ოლიმპიკის “ ერთ-ერთი მგზავრი - უკვე მსოფლიოში ცნობილი არტისტი ჩარლი ჩაპლინი გახლდათ. კონკურსში გამარჯვებული 60 წლის ილტონ ბერლი სიხარულით ცას ეწია, როდესაც მუნჯი კინოს ნომერ პირველმა ვარსკვლავმა ქათინაურებით შეამკო, ხელი ჩამოართვა და გადაკოცნა კიდეც.
- ალბათ, შინ რომ ჩავალ, არც დამიჯერებენ, რომ ჩარლი ჩაპლინთან ერთად ვიმგზავრე და, მეტიც, მცირე დიალოგიც კი მქონდა მასთან, - ბედნიერი სახით აცხადებდა მისტერ ბერლი.
გემი 1921 წლის 9 სექტემბერს მიადგა საუთჰემპტონის სანაპიროს, სადაც ჩაპლინისადმი თავისი სიყვარულისა და მოწიწების გამოსახატავად უამრავ ადამიანს მოეყარა თავი.
მსახიობის კარიერის მოწყობის ოცნებით შეპყრობილმა ჩაპლინმა წლების წინ დატოვა ეს ადგილები. მას შემდეგ პირველად ეწვია მშობლიურ მხარეს. მისი ოცნება ასრულდა. ის უკვე საქვეყნოდ ცნობილი მსახიობი და კინოსტუდიის მფლობელი იყო.
არასდროს, არსად დახვედრია ჩარლი ჩაპლინს თაყვანისმცემელთა ამხელა არმია. ავტომანქანას, რომლითაც ვარსკვლავი სასტუმროსკენ გადაადგილდებოდა, პოლიციელები მიაცილებდნენ. ამ დროისთვის თაყვანისმცემელთა სიჭარბეს უკვე მიჩვეული იყო ჩაპლინი, თუმცა, უნდა აღინიშნოს, რომ ინგლისელთა სიყვარული განსაკუთრებულად ახარებდა.
საინტერესოა, რას ფიქრობდა იგი იმ მომენტში, ან როგორ აისახებოდა საზოგადოების ამხელა ყურადღება მასზე. ვფიქრობთ, ის ყოველთვის შორს იყო ვარსკვლავური ჭირვეულობებისგან. მის მეგობრებს თუ დავუჯერებთ, ჩარლი ჩაპლინი ყოველთვის ისწრაფოდა, რათა ასეთი დიდების ფონზეც შეენარჩუნებინა ყველა ღირსეული ადამიანისათვის დამახასიათებელი სისადავე და გულისხმიერება, რაც გამოსდიოდა კიდეც.
გვიან ღამით ჩარლი ჩაპლინი მალულად ტოვებს ფეშენებელური სასტუმროს კედლებს. იპარება, რათა მოინახულოს ბავშვობის დროინდელი ადგილები - კენინგტონკროსის გადაღმა მდებარე ქუჩა. ის შემდეგაც ყოველთვის ასე იქცეოდა, როცა კი მშობლიურ ქალაქში აღმოჩნდებოდა ხოლმე. ეს ადგილები მისთვის ყველაზე ტკბილი და, ამავდროულად, ყველაზე მწარეც იყო. დაიარებოდა ბნელ ქუჩებში, რომლებშიც მისი ბავშვობის შემდგომ, დიდად არც არაფერი შეცვლილიყო. ეზოში, ისევ მწნილის სუნი ტრიალებდა, რადგან ის ჰეიუორდის საკონსერვო ქარხანას ესაზღვრებოდა. აი, მათი სახლის ფანჯრებიც, სადაც ჩარლი ქირით ცხოვრობდა დედასა და ძმასთან ერთად. ბავშვობაში ხშირად ავადმყოფობდა. ასეთ დროს, დედამისი, ჰანა ჩაპლინი, სწორედ ამ ფანჯარასთან დადგებოდა ხოლმე, როდესაც მის გამხიარულებას ცდილობდა, და აღუწერდა: ჩარლი, აი, ასეთი მამაკაცი მოდისო, და გამვლელის იმიტირებას ახდენდა პანტომიმის ენით, გვერდით კი ასეთი ბავშვი მოსდევსო, და იმასაც განასახიერებდა მონდომებით. ასეთი იყო ჩარლისათვის გართობის სახით მიწოდებული პირველი - მსახიობის ოსტატობისა და პანტომიმის, - დედისეული გაკვეთილები.
ამავე ქუჩაზე მდებარეობდა ჩარლი ჩაპლინის ბიძის ლუდხანაც, რომლის ერთ-ერთი მოსამსახურის, მოხუცი რამი ბენკსონის, სიარულის მანერით მომავალში ჩარლი ჩაპლინის ცნობილი „ მაწანწალა “ მსოფლიოს თითქმის ყველა ქვეყნის კინოდარბაზს შემოივლის, სიცილისა და აპლოდისმენტების თანხლებით. ამ ქუჩის რეალობით, ხედებითა თუ ადამიანური ურთიერთობებით, ჩარლი ჩაპლინის არაერთი ფილმი საზრდოობდა. მსახიობის მეგობარი ტომას ბერგი ამბობს: „ ჩარლის ისე სჭირდებოდა ამ ადგილების მონახულება, როგორც მსახიობს - სცენარში ჩახედვა “ . ძნელია, მას არ დაეთანხმო. ყველაფერი ხომ სწორედ ამ ქუჩიდან დაიწყო...
სამწლინახევრის ჩარლის ღრმად სწამდა, რომ ყველაფერი შეეძლო. სჯეროდა საკუთარი თავისა და შესაძლებლობებისა. თუ მისი 4 წლით უფროსი ძმა - სიდნეი - მონეტებს ყლაპავდა და მერე კეფიდან ამოაძვრენდა ხოლმე, ჩარლი რით იყო მასზე ნაკლები? ჰოდა, ერთხელ