წინასიტყვაობა
ტერი გუდკაინდის „ჯადოქრის პირველი კანონი“
ტერი გუდკაინდის პირველი რომანი, „ჯადოქრის პირველი კანონი“, Tor Books-მა 1994 წელს გამოსცა და იმ დროისთვის ეს არაჩვეულებრივი მოვლენა იყო. მხოლოდ ჩრდილოეთ ამერიკაში მილიონზე მეტი ეგზემპლარი გაიყიდა და დღემდე წელიწადში 100000 ეგზემპლარზე მეტი იყიდება. წიგნი ბესტსელერი გახდა გაერთიანებულ სამეფოშიც; ითარგმნა ოცზე მეტ ენაზე, მათ შორის აუდიოწიგნის ფორმატითაც.
რიჩარდისა და კელენის ამბავი დაყოფილია ათზე მეტ ნაწარმოებად. სერიის სახელია „ჭეშმარიტების მახვილი“. ბოლო წიგნი გამოცემულია 2007 წელს, სახელწოდებით „განმკითხავი“. გუდკაინდმა ადგილი დაიმკვიდრა „¹1 ნიუ-იორკ ტაიმსის“ ელიტური კლუბის ბესტსელერების ავტორთა შორის – დღემდე გაყიდულია მთლიანი სერიის 20 მილიონი ეგზემპლარი, ესე იგი, 220 მილიონი წიგნი.
გუდკაინდმა რომანით – „ჯადოქრის პირველი კანონი“ – მსოფლიოს გააცნო ჩვეულებრივი ტყის მეგზური რიჩარდ საიფერი და საიდუმლოებით მოცული ძლიერი ქალი კელენ ამნელი, რომელიც რიჩარდს შეუყვარდება. რიჩარდი ეგუება თავის ნამდვილ, მაძიებლისა და ჯადოქრის სახეს, ბედისწერას ადამიანისა, რომელსაც შეუძლია შეაჩეროს სისხლმოწყურებული ტირანი დარკენ რალი. კელენი ეძებს კეთილშობილ ჯადოქარს, რომელმაც უნდა დაასახელოს მაძიებელი – ჯადოსნური მახვილის ჭეშმარიტი მფლობელი, რომელიც საბოლოოდ დაუპირისპირდება დარკენ რალს.
„ჯადოქრის პირველი კანონის“ მნიშვნელობა სცილდება ჩვეულებრივ მიღწევებს. გუდკაინდი შეებრძოლა ძლიერ ლიტერატურულ გამოწვევებს – მისი მონათხრობი ამბავი არის დამმუხტველი, მძაფრი და სათავგადასავლო, რომელიც დააფიქრებს მკითხველს და ზეგავლენას მოახდენს მის არჩევანსა და მოქმედებაზე.
„ჯადოქრის პირველი კანონის“ წაკითხვიდან მრავალი წლის შემდეგაც გუდკაინდის თაყვანისმცემლები კვლავ ეკითხებიან საკუთარ თავს: „რისი გაკეთება შეეძლო რიჩარდს?“ – როცა პირისპირ ცხოვრებისეული დაბრკოლებები და გამოწვევებია.
„შენი ცხოვრება მხოლოდ შენ გეკუთვნის“, – ამბობს რიჩარდი საკვანძო მომენტში, – „ადექი და იცხოვრე“. და იმისთვის, რომ ეს ნაბიჯი გადადგათ, თქვენც ადექით და წაიკითხეთ ეს არაჩვეულებრივი რომანი.