შეერთებული შტატების ფოსტა
ლოს-ანჯელესი, კალიფორნია
ეთიკის კოდექსი
ჩვენი სისტემის ყველა თანამშრომლის ყურადღებას მივაპყრობთ ფოსტის თანამშრომელთა ეთიკის კოდექსს და დოკუმენტს თანამშრომელთა ქცევის ნორმების შესახებ, რომლებიც ჩამოყალიბებულია ფოსტის თანამშრომელთათვის განკუთვნილი ზოგადი ინსტრუქციის 742-ე და 744-ე პარაგრაფებში.
უკვე მრავალი წელია, საფოსტო სისტემის თანამშრომლები განუხრელად იცავენ ქვეყნის ერთგულად მსახურების დიდებულ ტრადიციას, რაშიც ჩვენს სფეროს ბადალი არ მოეპოვება. თავდადებული მსახურების ეს ტრადიცია თითოეულ ჩვენს თანამშრომელს უნდა ეამაყებოდეს. თითოეული ჩვენგანი უნდა ცდილობდეს, ღირსეული წვლილი შეიტანოს საფოსტო მომსახურების წინსვლა-განვითარებაში, საზოგადოებრივი ინტერესების უკეთ დაცვის მიზნით.
ფოსტის ნებისმიერ მომსახურეს ამ საზოგადოებრივი ინტერესებისადმი სრული თავდადება და მაღალი ზნეობრივი პრინციპების ქონა მოეთხოვება; იგი უნდა იცავდეს შეერთებული შტატების კანონებს და საფოსტო დეპრატამენტის რეგულაციებსა და დადგენილებებს. მაგრამ ეთიკის ნორმების დაცვა საკმარისი არ არის. საფოსტო სამსახურის მოხელეები და დაქირავებული პირები ყველა ღონეს უნდა ხმარობდნენ იმ დაბრკოლებების ასარიდებლად, რომლებიც საფოსტო სამსახურს მისი მოვალეობის შესრულებაში უშლის ხელს. აღნიშნული მოვალეობა კეთილსინდისიერად და ეფექტიანად უნდა სრულდებოდეს. საფოსტო სამსახური უნიკალურ პრივილეგიას ფლობს - მას ყოველდღე უხდება ურთიერთობა ქვეყნის უამრავ მოქალაქესთან და ხშირ შემთხვევებში ფედერალურ ხელისუფლებასთან მათი ყველაზე ახლო კავშირის განმახორციელებელ საშუალებად გვევლინება. ამგვარად, ფოსტის თითოეულ თანამშრომელს ეძლევა შესაძლებლობა და, ამავე დროს, ეკისრება პასუხისმგებლობა, რომ ღირსეული ქცევითა და თავდადებული შრომით მოიპოვოს საზოგადოების ნდობა. მოხელე, რომელიც ღირსეულად ემსახურება საფოსტო სამსახურის სისტემას, ფედერალური მთავრობის მიმართაც განამტკიცებს მოსახლეობის ნდობას.
ჩვენს ყველა თანამშრომელს მოეთხოვება ზოგადი ინსტრუქციების 742-ე ნაწილის ცოდნა, ეთიკური ქცევის ძირეული სტანდარტების, თანამშრომელთა პირადი ქცევის წესების, პოლიტიკურ საქმიანობაზე დაწესებული შეზღუდვების დაცვა.
საფოსტო განყოფილების უფროსი