მშობლის, საზოგადოების, ერის თუ კაცობრიობის მუდმივი ზრუნვის საგანია ჯანმრთელი თაობის აღზრდა. იდეალურ ამოცანად ითვლება ფსიქიკურად, ფიზიკურად და ზნეობრივად ჯანსაღი, ჰარმონიულად განვითარებული პიროვნების ფორმირება.
გადის საუკუნეები, გროვდება გამოცდილება, თითქოს იხვეწება სწავლა-აღზრდის სისტემა და მისი განხორციელების საშუალებები, მაგრამ უარყოფითი მოვლენები კი არ კლებულობს, ხშირად უფრო მატულობს. ამის დასტურია უამრავი ომი, ყაჩაღობა, ქურდობა, მკვლელობა, ეკოლოგიური კატასტროფა, ნარკობიზნესი და ა.შ. ძალზე მნიშვნელოვანია, რომ ადამიანი ერჩის არა მხოლოდ ადამიანს და გარემომცველ ბუნებას, არამედ საკუთარ თავსაც. იგი ნარკომანობით, ლოთობით, არანორმალური კვებით თუ უმოძრაობით ვნებს საკუთარ ჯანმრთელობას. ბევრი უფრო შორსაც მიდის - თვითმკვლელობით ამთავრებს სიცოცხლეს.
საზოგადოება დიდი ხანია იმის ცდაშია, რომ გაერკვეს შექმნილ ვითარებაში და დაძლიოს იგი. ამის სამსახურშია ჩაყენებული ფილოსოფია, რელიგია, მეცნიერების სხვადასხვა დარგი, განათლების და ჯანმრთელობის დაცვის სისტემები, ხელოვნება, არმია, პოლიცია, სამთავრობო თუ საზოგადოებრივი ორგანიზაციები. მიზეზებს ეძებდნენ ეკონომიკურ, სოციალურ თუ კლასობრივ სტრუქტურებში, ცოდვებში, გენეტიკურ თუ ასტროლოგიურ ფაქტორებში, სწავლა-აღზრდის თავისებურებებში, ბუნებისაგან ადამიანის მოწყვეტაში და ა.შ. მათგან თავის დაღწევისათვის მოწოდებულია სოციალური გარემოს ევოლუციური თუ რევოლუციური გარდაქმნის საშუალებები, რწმენის ამაღლება, ადამიანის ბუნებაში უფრო ღრმად ჩაწვდომა, განათლების სისტემის სრულყოფა, გარემოსთან უკეთ შეგუება, ესთეტიზაცია, სიყვარული, სექსუალური თავისუფლება და მრავალი სხვა.
ყველა აღნიშნული ფაქტორი დაკავშირებულია ადამიანის ნორმალურ თუ პათოლოგიურ მოქმედებასთან, მაგრამ არცერთი არაა გადამწყვეტი მნიშვნელობის. ზოგო მათგანი მხოლოდ საბაბია, სხვები კი - სულაც შედეგი.
სერიოზული ნაბიჯი იქნა წინ გადადგმული, როცა ძიების ობიექტი გახდა ფსიქიკური ფაქტორი, თუმცა მრავალ უზუსტობას ჰქონდა ადგილი. ამ ხარვეზების აღმოფხვრა მოხერხდა ჩვენი ჯგუფის („მენცარი“) მიერ წარმოებული კვლევა-ძიების საფუძველზე. აღმოჩნდა, რომ ადამიანის აგრესიულ, არანორმალურ ქმედებებს იწვევს ფსიქიკური აშლილობა, რასაც გადამწყვეტი მნიშვნელობა აქვს სულიერი თუ სხეულებრივი დაავადებების და ანტისაზოგადოებრივი ქცევის გამოწვევაში.
ჩუქება
