– შენ იცი რა არის მესამე ხარისხის დაკითხვა? – ეკითხება ბეგლარი მამაოს.
თავჩაღუნული მამაო პასუხად დუმილს შეაგებებს.
– კარგი!!! – სახე ეცვლება ბეგლარს, – გაიგებ მალე!!! ახლა კიდევ ერთხელ კარგად დაფიქრდი და გვიპასუხე: ცხუმარში ბავშვი რომ მონათლე, ჰიტლერი დაარქვი თუ არა?
– ცხუმარში ბავშვი არ მომინათლავს და ჰიტლერს როგორ დავარქმევდი...
– ვერ იხსენებ, ხო?... – აგრესიულად ჩაეკითხა ბეგლარი.
– ცხუმარში 30 წელია არ ვყოფილვარ, ვინაიდან ამ სოფელში მტრები ჰყავს ჩვენს გვარს და საიდან უნდა მომენათლა ცხუმარში ბავშვი? – გაოცებას ვერ მალავს მამაო.
– ესე იგი, არა!!!!
– არც ვიცი, ვინაა ჰიტლერი...
– აგალაპარაკებ ახლავე, – სიტყვას გააწყვეტინებს ბეგლარი, გამწარებული წამოხტება, თავის სკამს ფეხს წააძრობს, მამაოს მივარდება და უმოწყალოდ ცემას დაუწყებს.