სატვირთოში
ნომები და დრო ნომები ძალიან პატარები არიან. პატარა არსებები. დიდხანს ვერ ცოცხლობენ, ან იქნებ, მეტისმეტად სწრაფად ცოცხლობენ?
ნება მომეცით, აგიხსნათ.
დედამიწაზე მობინადრე ქმნილებათა შორის, ყველაზე ცოტა ხანს ზრდასრული ერთდღიურები(მწერების სახეობა. ცოცხლობენ რამდენიმე საათიდან ერთ ან რამდენიმე დღემდე.) ცოცხლობენ. მათი სიცოცხლის ხანგრძლივობას, ალბათ, სახელითაც მიხვდებოდით. ყველაზე ხანგრძლივი სიცოცხლე კი ხშირწიწვიან ფიჭვს ებოძა - ის ოთხი ათას შვიდას წელს და მეტხანსაც ცოცხლობს.
შეიძლება მოგეჩვენოთ, რომ ერთდღიურებს არ გაუმართლათ, მაგრამ მთავარი ის კი არ არის, რამდენ ხანს იცოცხლებ, არამედ ის, რამდენად ხანგრძლივი მოგეჩვენება ეს სიცოცხლე.
ვინ იცის, იქნებ ერთდღიურთათვის ერთი საათი იმდენ ხანს გრძელდება, რამდენ ხანსაც ჩვენთვის - საუკუნე. ალბათ, მოხუცი ერთდღიურები იკრიბებიან და ერთმანეთს შესჩივიან, რომ ბოლო წუთები ვერც კი შეედრება ძველ, კარგ დროს, როცა სამყარო უფრო ახალგაზრდა იყო, მზე უფრო კაშკაშებდა და ლარვები უფროსებს პატივს სცემდნენ. ხეები კი, რომლებიც ძალიან ნელა იზრდებიან, შეიძლება ფესვების გახმობამდე და მერქნიჭამია მატლების შესევამდე მხოლოდ მოკაშკაშე ვარსკვლავების დანახვას ასწრებენ.
ყველაფერი შედარებითია და იმაზეა დამოკიდებული, როგორ შეხედავ. რაც უფრო სწრაფად ცოცხლობ, მით უფრო იწელება დრო. ჰოდა, ნომისთვის ერთი წელი იმდენ ხანს გრძელდება, რამდენსაც ადამიანისთვის - ათწლეული. ეს დაიმახსოვრეთ და ნომებზე არ იღელვოთ. მათ ეს არ ადარდებთ. არც კი იციან, რომ უნდა იდარდონ.
დასაწყისში...
I. იყო ადგილი ერთი.
II. და ნახა „ძმებმა არნოლდებმა“(Arnold bros; – brothers-ის შემოკლებული ფორმაა. იხმარება კომპანიების სახელწოდებებში.) (დაარს.1905) ეს ადგილი და ძალიან მოეწონა.
III. რადგან იყო მთავარ ქუჩაზე.
IV. და დადიოდნენ იქ ავტობუსებიც.
V. და განაცხადა „ძმებმა არნოლდებმა“ (დაარს.1905): დაე, აშენდეს აქ უნივერსალური მაღაზია, ისეთი, როგორიც არავის უნახავს აქამდე.
VI. და გადაიჭიმოს იგი პალმერ-სთრითიდან თევზების ბაზრობამდე და მთავარი ქუჩიდან დისრაელი-როუდამდე.
VII. იყოს ხუთსართულიანი და ჰქონდეს სართული ცოკოლისა. და დამშვენდეს ლიფტებით; და დაინთოს მარადიული ცეცხლი საქვაბისა, რომელიც იქნება ცოკოლის სართულის ქვეშ. და იყოს ყველა სართულს ზემოთ ბუღალტერია, რომელიც მართავს ყველაფერს.
VIII. და განითქვას სახელი „ძმები არნოლდებისა“ (დაარს.1905), რომელმაც ყველაფერი მოაქცია ერთ ჭერქვეშ. და ეწოდოს ამ ადგილს ამიერიდან და უკუნისამდე „შპს „ძმები არნოლდების უნივერსალური მაღაზია (დაარს. 1905)“.
IX. და ასეც მოხდა.
X. და დაყო „ძმებმა არნოლდებმა“ (დაარს.1905) უნივერსალური მაღაზია მრავალ ნაწილად: რკინა-კავეულის, მოდური კაბების, ქალთა თეთრეულისა და სხვა განყოფილებებად. და შეკრიბა ქალები და კაცები, რომელნიც ამბობდნენ: „აქ არის ყველაფერი ერთ ჭერქვეშ.“ და თქვა „ძმებმა არნოლდებმა“ (დაარს.1905): დაე, გაჩნდეს სატვირთოები, შეიღებოს ისინი წითლად და ოქროსფრად და იარონ, რათა ამცნონ ყველას: „ძმები არნოლდები“ (დაარს.1905) შინ მოგართმევთ ყველაფერს, რაც გჭირდებათ.“
XI. და დაიწყო საშობაო ბაზრობების, საზამთრო გაყიდვის, სეზონურ ფასდაკლებათა და სასკოლო ბაზრობათა სერიები.
XII. და მოვიდნენ უნივერსალურ მაღაზიაში ნომები, რათა დამკვიდრებულიყვნენ იქ უკუნითი უკუნისამდე.
ნომების წიგნი, საფუძვლები, მუხლი I-XII