"აინშტაინი, ფრანკენშტეინი და დრაკულა იმ დღეს №11 ავტობუსით მივდიოდი ავჭალიდან და სარაჯიშვილის მეტრომდე სულ იმის ფიქრში ვიყავი, ჩამოვსულიყავი თუ არა ლუდის დასალევად მეტროსთან. ლუდი ყველგანაც იყიდება, მაგრამ სხვაგან სულ ლარნახევრები და ლაროთხმოცებია, თუ მეტი არა. სარაჯიშვილის მეტროს წინ კი ეს სასმელი ლარიოცი ღირს. ადგილს, სადაც ლუდი იყიდება, ფეშენებელური ნამდვილად ვერ დაერქმევა, რადგან რაღაც ვაგონი თუ ვაგონის მსგავსია... ამ ვაგონის მსგავსს გააჩნია სამი ცოტა დაჩუტული ბორბალი, ხოლო მეოთხე ბორბლის მაგივრად მის მეპატრონეებს ღერძის ქვეშ აგურები შეუწყვიათ. ლუდს თეთრ ხალათში გამოწყობილი, ოდნავ შებერებული ძუ მაჩვი ყიდის. ის ნაშიერებს ვინძლო უკვე ვეღარ აჩენს, თუმცა მამრებს ზოგჯერ ისე `ალივერებს~, რომ ეტყობა გასანაყოფიერებლად კვლავაც მზადაა. ძუ მაჩვს უკეთია ხელებზე დიდი რაოდენობით ოქროს ბეჭდები, ტუჩები პომადით მოუთხუპნია და ლუდის დასხმისას ნდომით იცქირება თავისი ფუღუროდან."
ჩუქება
