ყველა კაცი
იდიოტი არ არის! – ამ ქალაქში ხომ სულ ერთი და იგივე ხალხი თხოვდება, რა... – ჩაიბურტყუნა შუახნის ქალბატონმა და შარდენზე მოსეირნე ახალშეუღლებულ წყვილს შურის თვალი გააყოლა.
– კარგი რა, იამზე, პირველი წრეა რთული, თორემ მერე მიდის რიხინ-რიხინით, – უპასუხა თანამეინახემ და კაპუჩინოს სქელი, გემრიელი, შოკოლადნარევი ქაფი მოხსნა, – ეს ყავაც ხომ პირდაპირ განში გადის, რა...
– ჰოდა, მეც ამას ვამბობ, ჩემო ლამზირა, რა უსამართლობაა ეს? იმისთვის აგროვა ცხონებულმა დედაჩემმა მთელი ცხოვრება ჩემი მზითევი, რომ ასე გადახუნებულიყო და ნაფტალინით აქოთებულიყო?
– აბა, ქალო, ამ კობალტის სერვიზებისთვის მაინც არ გადაგვეკლა თავები, ან ამდენი ხელი ქათქათა, გახამებული თეთრეული ვის რა ჯანდაბად უნდოდა? აგერ, ჩემი მეზობელი ნინუცა მესამედ გათხოვდა და ფენს ჭყეტელა „ჟატის“ ზეწრებს, არც დანამვა უნდა და არც გაუთოება!
– დაგვრჩა, მგონი, ოხრად ბაღჩა-ბრილიანტები, ბაჯაღლოს „კალიცოები“ და პირველი ღამის ბუმბულებიანი პენუარი.... ამ ქალაქში მართლა სულ ერთი და იგივე ხალხი თხოვდება... – ამოიოხრა იამზემ, ორი ყავის ფული გადაიხადა, ლამზირას ხელკავი გაუკეთა და მარტოობასთან მორიგ პაემანზე გაეშურა...
ძვირფასო ქალბატონებო, არა მგონია, რომ იამზესა და ლამზირას შარდენული საღამო თქვენი ცხოვრების აპოთეოზი იყოს! მართალი ვარ, არა?
მაშ, წინ, ახალი ცხოვრებისკენ, თავგადასავლებისკენ და რა თქმა უნდა, სიყვარულისკენ! და გვახსოვდეს – ყველა კაცი იდიოტი არ არის!
ესე იგი, შანსიც არსებობს!
მოკლედ, მე გადავდივარ „შენობით“ ფორმაზე, ვამაგრებ ჩემს ვირტუალურ „საომარ პოზიციას“ ცივი ყავით და შავი შოკოლადით, რასაც შენც გირჩევ, რადგან ყავა ტონუსია, ხოლო შოკოლადი – ტვინისთვის აუცილებელი გლუკოზა.
იკითხავ – სად ომი, სად ქორწინებაო? მათ შორის სწორედაც რომ პირდაპირი კავშირი არსებობს. აბა, სად გინახავს ნებით მმაჩის ბიუროში მიბრძანებული მამაკაცი? აქ სტრატეგიაა აუცილებელი, თანაც ისეთი, თავად სუვოროვსაც რომ გაუკვირდებოდა!
საკრალური ფრაზის – „დიახ, თანახმა ვარ!“ – თქმის პროცესში მამრი საბოლოოდ აცნობიერებს, რომ ჩვენ მიერ ვირტუოზულად დაგებულ მახეში გაიხლართა, მაგრამ აბა, რაღა დროს? მეფური სუფრა გაშლილია, გულაჩუყებული და თვალცრემლიანი დედ-მამა მძახლებს უზიარებს ემოციას, პირველი ცეკვა ათასჯერ არის დატრენინგებული და, რაც მთავარია, შენი გულის სწორის შეფი საქორწილო სუფრის თამადაა! აბა, რომელი კაცი დაარღვევს ამგვარ იდილიას? დიახ! არც ერთი და ვერც ერთი... მოკლედ, რა მნიშვნელობა აქვს? მოვიტეხოთ შოკოლადის ფილა და შევიმუშაოთ გათხოვების სტრატეგიული გეგმა საფეხურების მიხედვით.