1. „ჩემზე უარესები“
„კეთილია ხელმწიფე,
ვინც დუმს და
არას ითხოვს ხალხისგან,
უკეთურია ხელმწიფე,
ვინცა სიყვარულსა და დიდებას
მოითხოვს ხალხისგან.
შლეგია ხელმწიფე,
ვის წინაშეც ძრწის ხალხი,
გულბოროტია ხელმწიფე,
ვინც ეზიზღებათ“.
ლაო ძი,1 „დაო დე ძინი“
- 1940 წლის 8 აპრილს დაბადებული ვივიენ ვესტვუდი, ინგლისელი მოდის დიზაინერი, მეამბოხე, წითური ბრიტანელი ქალი თავისუფლების, დაუმორჩილებლობის, სექსუალურობისა და ამავე დროს პატრიოტიზმის სიმბოლოდ იქცა. მან დროს გაუსწრო და ჯერ კიდევ ბევრ ქვეყანაში გაუმართავ სასამართლო რეფორმებს დაუპირისპირდა. ვივიენის საბავშვო მაისურები წარწერით „მე ტერორისტი არა ვარ, ნუ დამიჭერთ!“ სკანდალური და მრავლისმთქმელი, ათწლეულის ჰიტად იქცა. ეს წითური ქალბატონის სულის ამბოხი გახლდათ!
მისი საქველმოქმედო პროექტები ორიგინალური და ნოვატორულია, ვივიენი არ მართავს აღვირახსნილი ჭამა-სმის ცერემონიალებს, სადაც დარჩენილი მონაკბეჩი ღვეზელი უპოვართ გადაუნაწილდებათ. ახალი კოლექციის შესაქმნელად იგი ასაქმებს ქალებს, რომელთაც ყველაზე ძალიან უჭირთ. მაგალითად, ვივიენისთვის მომუშავე კენიელ ქალთა რიცხვი 7000-იან ნიშნულს აჭარბებს. იგი ყველაზე ძვირად ღირებული დიზაინერია. და კიდევ, ვივიენი მუდმივად აკრიტიკებს სამეფო დინასტიის წარმომადგენლებს. სამაგიეროდ, ისინი მუდმივად ეპატიჟებიან მას სამეფო ნადიმებზე!
- მაგარია, მომწონს! აბა, აბა, სიგარეტის დროც მოვიდა, პერეკურ! - ლიზიკომ მოდური, თეთრჩარჩოიანი სათვალე თვალებიდან თავზე გადაანაცვლა, კომპიუტერის მაგიდას გორგოლაჭებიანი სკამის მეშვეობით კარგა გვარიანად დაშორდა და ყავის აპარატთან ჩაუშვა ღუზა.
- ოჰო, რადგან შენი გული მოვიგეთ, რაღას ვჩივით, - მაგდას ხმაში წყენა გამოკრთოდა.
- კარგი რა, მაგდუსი, ნუ მებუტები! ხომ ხედავ, ცოტა წავიმუშავეთ და რა კარგ მასალას მივაკვლიეთ! აბა, სირცხვილი არ არის მაყურებელი მუდმივად ვაკუუმში ამყოფო?
- მერე ვინ გეუბნება, რომ არ გეთანხმები, უბრალოდ, ფორმას გააჩნია! ისე დაგვცოფე ყველა, ვიფიქრე ანტირაბიული სამსახურის გამოძახების დროა-მეთქი...
- კარგი, კარგი, ვაღიარებ, ცოტა ზედმეტი მომივიდა, მაგრამ რომ წარმოვიდგენ ზოგიერთ ქართველ ვითომ დიზაინერს, წელიწადში ოთხი ჩვენება რომ აქვთ, ჩვენი ჯიბეების დაცარიელების ხარჯზე ამ იდიოტურ თითიდან გამოწოვილ ფეშენებზე... ვივიენ ვესტვუდს კი წელიწადში ერთი! მინდა ქართველ ორგანიზატორებს მათი გაჯაზებული მოდელიერების ბაზრობა-განავალი ძონძების, ცხოვრების ბოლომდე ტარება მივუსაჯო! აბა, გაბედონ და გააზავონ რაიმე ადამიანურით! მოკლედ, რისხვა მათ, და პატიების თხოვნა შენ!
ლიზიკომ ხელები მკერდზე გადაიჯვარედინა და თვალები თეატრალურად მაღლა აღაპყრო.
- კარგი, კარგი, ნაპატიები ხარ, - გაეცინა მაგდას, - თანაც რაღაცით მაგრად ჰგავხარ, არ ვიცი, სიგიჟით თუ თმის ფერით. ვივიენივით წითური ხარ! იმედია, ეს ყველაფერი ღირდა იმად, რომ ჩვენი მაყურებელი ნასიამოვნები დარჩეს და იგრძნოს განსხვავება ნამდვილსა და ყალბს შორის. ჰო, თანაც, ის ბოლო ფრაზა: „ვივიენი მუდმივად აკრიტიკებს სამეფო დინასტიის წარმომადგენლებს, მაგრამ ისინი მუდმივად ეპატიჟებიან მას სამეფო ნადიმებზე!“ ძალიან შთამბეჭდავია. აბა, ჩვენი საწყალი ჩმოზაინერები სულ მაღალ-მაღალი ეშელონების ცოლების ერთი ადგილის ლოკვით არიან დაკავებულები. იქნებ „მადლი“ მათზეც გადმოვიდეს..
- ჰო, დღისით ცოლების უკანალს ლოკავენ, საღამოს ქმრებისას! დიზაინერ-სუტენიორი ხომ ახალი პოსტრევოლუციური ჰიტია. ნაირ-ნაირი ქუსლებგაუხეხავი ფეშენგოგონები... ხელმისაწვდომი პრეისკურანტი 50 ლარიდან და ზევით... აბა, იაფად მოდელები, მისები და ვიცე-მისები... რა ქნან? პატარები არიან და ჯერ კიდევ ჟღარუნა სათამაშოები სჭირდებათ განვითარებისთვის. თანაც, ატამანს ხომ არ აუხირდებიან?
გოგონებს სიცილი წასკდათ და ლიზიკოს ყავამ დიდი და ყავისფერი ლაქით გაჟღინთა თოქშოუ „მხილების“ საეთერო ვიორსტკა.
ლიზიკო და მაგდა დიდი ხნის მეგობრები იყვნენ. პაზოლინისეული პერსონაჟი - შავგვრემანი, გრძელფეხება ეშხიანი მაგდა და ხვეული, ჟღალი, ცეცხლისფერი თმით, მწვანე თვალებით და უზადო ტანით ლიზიკო, როგორც ცა და დედამიწა ისე განსხვავდებოდნენ ერთმანეთისგან გარეგნობითაც და ხასიათითაც. მაგრამ სწორედ ეს ცხოვრებისადმი სხვადასხვაგვარი დამოკიდებულება აერთიანებდა მეგობრებს ახლა, როდესაც ლიზიკოს, როგორც იქნა ეღირსა საკუთარი გადაცემა. მან გაწონასწორებული, იუმორითა და სიცოცხლით სავსე მაგდა პროდიუსერად მიიწვია. აბა, ვიღაცას ხომ უნდა ეკონტროლებინა ჟღალი ლიზიკოს ფეთქებადი ბუნება, და რაღა თქმა უნდა, მისი არაორდინარული ხასიათიც!..
რატომ „როგორც იქნა?“
იმიტომ, რომ საქართველოში ყველა სფეროს ან 95%-ს უკვე დიდი ხანია არაპროფესიონალები, არაადეკვატურები და არაპრეზენტაბელურები დაეუფლნენ. პრინციპი: „მე თუ არ ვვარგივარ, შენ ჩემზე უარესი უნდა იყო, რომ მე არ დავკომპლექსდე“ - კარგად ამუშავდა.
ოდესღაც ქართულად ნამღერი „ყველამ ჩადრი აიფაროს, რომ მე წყნარად ვიარო“, ისევე, როგორც ყველაფერი სამამულო, ცალმხრივად და უნიჭოდ იყო პერიფრაზირებული. სამაგიეროდ, მოციმციმე ცისფერი ეკრანიდან მორიგი მოღიმარი ფეისი არ აღიზიანებდა სამეფო კარს. თავს ასე იმშვიდებდნენ: ისინი ხომ კიდევ უფრო მდაბიონი არიან, ვიდრე ჩვენ???
„ჩემზე უარესები“ კი, იცოცხლე, ამობიბინდნენ, ფესვები გაიდგეს, ცელულიდები და
ჩუქება
