დიაგნოზი
კაცი ბოლთას სცემდა. ქალი მაგიდასთან იჯდა. ხელში საწერკალამი ეჭირა და რაღაცას ანგარიშობდა. დაამთავრა თუ არა საქმე, სათვალიდან ამოიხედა და კაცს უხმო:
დავით, მობრძნდით, ყველაფერი დავასრულე! კაცი თავზე შემოწყობილი ხელებით სცემდა ბოლთას. ოთახის ბოლოს, გასასვლელ კართან იდგა. თითქოს ფეხების თრევით მიუახლოვდა.
ყველაფერი დათვლილია, უთხრა ქალმა და სათვალე მოიხსნა ფაილს დაგიფორვარდებთ... ეს გამოსავალზე მეტიც არის... ამ დღეში იყო გახოკიძეც. მასაც ბიზნესი დაუბლოკეს... მოკლედ, თუ გსურთ, თქვენი სააფთიაქო ქსელი არ ჩაიძიროს, ასე უნდა მოვიქცეთ გახოკიძის სპირტის მარაგს თქვენს სააფთიაქო ქსელში შევუშვებთ და ეტიკეტზე „სამედიცინო ბალზამს“ დავაწერთ. გასაღებას რეკლამა არ დასჭირდება, ე. წ. სპირტი არაყზე გაცილებით იაფი ეღირება... ეს ამბავი ერთ კვირაში ყველა „ლოთს“ და „კარგ მსმელს“ ეცოდინება. მოკლედ, ვერც სახელმწიფო ორგანო შემოგედავებათ და ვერც გენო მარგიანი, ყოველ შემთხვევაში, ამ ეტაპზე... ეს თქვა და სათვალე ბუდეში ჩადო, რომელიც იქვე, მაგიდაზე ედო. ბუდე მწვანე იყო, სათვალის ჩარჩო თეთრი. ზურგით მიეყრდნო სტანდარტულ სკამს, როგორიც ოფისებში აქვთ ხოლმე და ადვილადაც დაიმორჩილა, კაციც სტანდარტული მილიონერი იყო, ჭირდა მისი რამეში დარწმუნება. ერთი შეხედვით, დამშვიდებული ჩანდა, გონებაში მაინც უამრავი „მაგრამ“ უტრიალებდა. ქალმა ეს იცოდა და განაგრძო:
ასე მოვიქცევით, ხვალ დარეგისტრირდება თქვენი „სამედიცინო ბალზამი“. აგრეთვე მინდა მოგახსენოთ, რომ უკვე სახელმწიფო ლიცენზიაც გვაქვს მიღებული. გავყიდით „ვითომ“ სამედიცინო სპირტს, ე. ი. იაფფასიან არაყს. შემდგენლობაში სპირტს ჩავწერთ. რადგან სამედიცინო სპირტს აქციზი არ სჭირდება, დამატებით 20 პროცენტსაც ვზოგავთ... ქალმა გადაშლილი ბლოკნოტი დახურა და კალამს თავსახური მოარგო.
დემპინგური ფასების საშუალებით, გენო მარგიანმა ამ ეტაპზე ძირითად პრეპარატებზე კონკურენციის გაჩაღება მოახერხა, კლიენტებს კარგავთ და, თუ ასე გაგრძელდა, მხოლოდ შტატის შემცირება არ გიშველით. კომპანიის ფინანსური მაჩვენებელი მკვეთრად დაეცემა. მთავარია, ამ წელს გაუძლოთ... სპირტს გახოკიძე მოგაწვდით, საქმის კურსშია და თანახმაა, რაც შეიძლება იაფად მოგყიდით... ისიც ჩემი კლიენტია... ასე რომ, ორივეს გეშველებათ. ასაღელვებელი აღარაფერია... კარგი ხარისხის „სამედიცინო ბალზამს“ ალკოჰოლურ სასმელთან შედარებით გაცილებით დაბალ ფასში გაყიდით. ასე რომ, გენოს მაქინაციას ჩვენ ალკოტრეიდით დავუპირისპირდებით და პრობლემაც მოგვარდება, ქალმა საუბარი დაასრულა. ჩანთიდან სამაგრი ამოიღო და გაშლილი თმა სანახევროდ შეიკრა. კაცი უფრო დამშვიდებული ჩანდა, თუმცა თვალებს მაინც აქეთიქით აცეცებდა.
შენ რომ არა, არ ვიცი... მოკლედ, ხომ გესმის... მაგარი აზრები მოგდის, რაა! კაცმა ქალს კონვერტი გადააწოდა. კონვერტი თეთრი იყო. საშუალო ზომის. კარგად შებერილი. ზედ შავი მელნიანი კალამით ეწერა თანხის ოდენობა. პრინციპში, ეგ გეგმა მისაღებია... პრინციპში. ამ სიტუაციიდან გამოვძვრები და... ჩემთან მიგიღებ... უთხრა კაცმა. ქალს გაეცინა, ეცადა, ძალიან არ შეემჩნია.
გმადლობ, უპასუხა ქალმა და კონვერტი გამოართვა. თვალი ისე შეავლო, რომ არ გაუხსნია და არც გადაუთვლია, პირდაპირ გახსნილ ჩანთაში ჩააგდო. ჩანთა რომ დახურა, კვლავ კაცს მიუბრუნდა.
მაგრამ, როგორც ჩანს, დაგვიწყნიათ ჩვენი შეთანხმება... მე ბოსები არ მიყვარს... თქვენი პრობლემა მოგვარდება და ჩვენ ერთმანეთს აღარ ვიცნობთ. თქვენ ფულს მიხდით, მე პრობლემების მოგვარებაში გეხმარებით, ეს უბრალო, მაგრამ ძვირადღირებული სერვისია და სხვა არაფერი ქალმა ჩანთა გადაიკიდა მხარზე და ჩექმები გაისწორა. ყავისფერი ნატის ჩექმა ეცვა, უკან მწვანე ელვით.
აქ იმაზე მეტია, ჩვენ რომ შევთანხმდით თქვა კაცმა სასხვათაშორისოდ. თვალით კონვერტზე მიანიშნა, ქალის ჩანთას დახედა. მერე ქალს აშკარად დააშტერდა, გაუხმოვანებელ ინიციატივაზე ელოდა პასუხს. დიდად არ იმედოვნებდა, მაგრამ მაინც... ქალმა პიჯაკი მოიცვა. თითქოს ორივე ხელი ერთდროულად გაუყარაო. გაუღიმა. პომადა თუ მაჩნევიაო, ტუჩი ტუჩს გადაუსვა და კაცს თვალმოუშორებლად განუმარტა:
ეგ თქვენი კეთილი ნებაა... მე არაფერ შუაში ვარ. ხელშეკრულების ფარგლებში ვმოქმედებ მხოლოდ და მხოლოდ! ხელშეკრულების ჩარჩოებია ჩვენი სურვილების მთავარი მბოჭავი.
როგორ, გამოდის, რომ დღეს გემშვიდობები? კაცი თავისას არ იშლიდა. არ სურდა ასე ადვილად დანებება რა დამოკიდებულებაა „არ მიცნობ, არ გიცნობ“? ნუთუ შეუძლებელია საქმის იქით მეგობრობა? როგორც ჩანს, კარგ ხასიათზე დადგა, იმედი მიეცა, თვალები აუციმციმდა დაგირეკავ, მოგიკითხავ, აღვნიშნოთ ჩვენი წარმატება? ჩვენი ნება არაა?
ამაზე არ შევთანხმებულვართ... თანაც, რაც უკვე შემოგთავაზეთ, იმაზე უკეთესს და სასარგებლოს ჩემგან ვერაფერს მიიღებთ. როგორც წესი, საქმიანი ურთიერთობის დასრულების შემდეგ აღარ ვხვდები კლიენტებს... თუ ჩემთან შეხვედრას ისურვებთ, მხოლოდ ერთ შემთხვევაში... უპასუხა ქალმა დინჯად.
ბრძანეთ, გენაცვალე, თანახმა ვარ, თქვა კაცმა და პასუხს დაელოდა. გაიტრუნა რძის მომლოდინე კატასავით, რომელსაც სადაცაა ლამბაქზე რძეს დაუსხამენ.
ახალი კლიენტი მომიყვანეთ... გადაზიდვებთან დაკავშირებით კარგი იდეებია, ლერამ პალტოს ჩაცმა დააპირა, კაცი