მადლიერების სიტყვები „ეს ყველამ უნდა იცოდეს! ყველამ უნდა გაიგოს რა მოხდა სინამდვილეში და რატომ! აუცილებლად დაწერეთ წიგნი, რომ ყველას შეეძლოს ამის გაგება!“ – ასეთი თხოვნით მომმართა ბევრმა თანამოქალაქემ 2010 წლის აგვისტოში საზოგადოებრივი ტელევიზიის მეორე არხზე ჩემი რამდენიმე გამოსვლის შემდეგ. იმ გამოსვლებში საშუალება მომეცა მეამბო ჩვენი ხალხისათვის, როგორ მივედით 2008 წლის 7 აგვისტომდე, რატომ და როგორ მოხდა ის აბსურდული ომი და რა ხდება მას შემდეგ. რჩევა და თხოვნა, დამეწერა ამაზე წიგნი, ადრეც მომისმენია, ძირითადად ჩემი ნაცნობებისაგან, მათ შორის დასავლელი დიპლომატებისა და ექსპერტებისაგან, ვისაც ახსოვდა ქართული პოლიტიკის ჩემი ანალიზი და პროგნოზები, მაგრამ 2010 წლის აგვისტოში ჩემი სატელევიზიო გამოსვლების შემდეგ ამას მასობრივად მთხოვდნენ ჩემთვის უცნობი თანამოქალაქეები (კიდევ ერთხელ ვიგრძენი ტელევიზიის ძალა!).
ადრეც მინდოდა თავი მომეყარა მასალებისათვის და კიდევ ერთხელ გამეაზრებინა ყველაფერი, რისი მოწმე და ზოგჯერ მონაწილეც გავხდი 1992 წლის გაზაფხულიდან დღემდე.
თანამოქალაქეების მასობრივმა თხოვნამ დიდი სტიმული მომცა. მიუხედავად ყოველდღიური, სავალდებულო საქმეებით დატვირთულობისა, შევუდექი მუშაობას. პროცესი ბევრად უფრო საინტერესო აღმოჩნდა, ვიდრე ველოდი. მასალების შეგროვების, დახარისხებისა და გაანალიზებისას თვისობრივად ახალ დონეზე გავიაზრე ყველაფერი.
მესმის, რომ დღევანდელ პირობებში წიგნის გამოცემა ვერ განაპირობებს იმას, რომ „ყველამ გაიგოს, რა მოხდა და რატომ“ – წიგნს დღეს, როგორც წესი, გაცილებით ნაკლები მკითხველი ჰყავს, ვიდრე მაყურებელი სატელევიზიო გადაცემას ან, თუნდაც, მკითხველი – პოპულარულ გაზეთს. მაგრამ დიდ მნიშვნელობას ვანიჭებ იმას, რომ წიგნში ერთადაა თავმოყრილი ბევრი საგულისხმო ფაქტი და რომ მართალი წიგნი უძლებს დროის გამოცდას.
დიდი მადლობა მინდა ვუთხრა ყველას, ვინც კი მირჩია და მთხოვა დამეწერა ეს წიგნი. ასევე ყველას, ვინც მომაწოდა საინტერესო და ხშირ შემთხვევაში კონფიდენციალური ინფორმაცია. განსაკუთრებით მადლობელი ვარ ცნობილი ვებსაიტების – civil.ge-სა და foreignpress.ge-სა. ჩემი ჩანაწერების შედარებამ civil.ge-ს არქივთან და იქ მოცემული, ყველასათვის ხელმისაწვდომი მასალების გამოყენებამ, ასევე foreignpress.ge-ს საიტზე თავმოყრილმა უცხოურმა წერილებმა, დიდად შემიწყო ხელი.
მინდა პატივი მივაგო 2011 წელს გარდაცვლილი რონალდ ასმუსის ხსოვნას. ცნობილმა ექსპერტმა და საქართველოს ნამდვილმა მეგობარმა რონ ასმუსმა, მიუხედავად მძიმე ავადმყოფობისა
, დაუღალავი შრომის შედეგად მოასწრო დაეწერა და გამოეცა მნიშვნელოვანი ნაშრომი – „მცირე ომი, რომელმაც შეძრა მსოფლიო“. ამ წიგნმა მრავალ ადამიანს მსოფლიოში აუწყა ჩვენი ტრაგედიის შესახებ.
თბილისი,
2011 წლის აგვისტო