სვანი ლექსოს ამერიკული ულისეიდამ
“როლინგ სტოუნზის“ კონცერტამდე ორიოდე საათით ადრე, დათქმულ ადგილზე, ერთ-ერთ ბარში, სვანი ლექსო თანამშრომლის ძმას, ადვოკატ ჯიმი რეის შეხვდა. ბილეთი, სწორედ, ჯიმი რეიმ უყიდა. ლექსოს წამიერად კი ემცხეთა ასეთი ყურადღება უცნობი მამაკაცისგან, მაგრამ ფარულ ზრახვებს მაინც ვერ მიუხვდა. ზოგჯერ რთულია, დაინახო სხვებში ის, რაც შენთვის უცხოა.
ერთი სიტყვით, ბარში შეიყარნენ ჯიმი რეი, სვანი ლექსო და ორი შვედი ქალბატონი. ქალბატონები - ზედმეტად მაღლები და... ტანადობის რა მოგახსენოთ... მოკლედ, ვიკინგი დედაკაცები - ერთმანეთისადმი ლტოლვას არ მალავდნენ.
ჯიმი რეი უკვე კარგად შეზარხოშებულიყო და ვერაფრით აეხსნა, როგორ აღმოჩნდა ამ ქალბატონების გარემოცვაში. ერთ ჭიქა ტეკილას მეორე მოჰყვა, მერე კიდევ ერთი, მერე ერთი და ნახევარი, რასაც დაემატა სხვა, ავადსახსენებელი და სულისწარმწყმედი ნივთიერებები... და ლექსოს გამოეცხადნენ კონსტანტინესავარსამიძისეული დიონისო და ეროსი, თანაც ერთად. ღმერთებმა შეშფოთება-აღშფოთება გამოთქვეს ლექსოს პასიურობის გამო და დაჟინებით მოუწოდეს მოქმედებისკენ.
ლექსომაც არ დააყოვნა და შედარებით დაბალ და გამხდარ ვიკინგ დედაკაცს გამოეცნაურა. „გამოეცნაურა“, ცოტა არ იყოს, ხმამაღალი ნათქვამია. უფრო გაშინაურების მცდელობას წააგავდა, რამეთუ ლექსოს ინგლისური უზადობით ნამდვილად არ გამოირჩეოდა. საუბარში (სავარაუდოდ, თავისი ტერიტორიის დაცვის მიზნით) მეორე ვიკინგი დედაკაციც ჩაერთო. მას ლექსო წამდაუწუმ „დაიკოთი“[1] მიმართავდა და ამ ქართულ სიტყვას ისედაც დაულაგებელ ინგლისურ ფრაზებში ურევდა, რაც დედაკაცს რატომღაც ძალიან აღიზიანებდა.
არავინ იცის, როგორ აღმოჩნდა მცირერიცხოვანი, მაგრამ ხმაურიანი ამერიკულ-შვედურ-სვანური ინტერნაციონალი სტადიონზე. „როლინგ სტოუნზის“ მჩქეფარე მელოდიების ფონზე სვანურ-შვედური ვერბალური ménage à trois კიდევ უფრო ამაღელვებელ სახეს იღებდა.
სვანი ლექსო თავის რჩეულ ვიკინგ დედაკაცს ეალერსებოდა. ქალბატონიც, თურმე, ყველანაირსექსუალი ეროსის თაყვანისმცემელი აღმოჩნდა და არც ის აკლებდა ლექსოს ალერსს. ერთი ის იყო, რომ დროგამოშვებით შეშინებული სახით „დაიკოსკენ“ გააპარებდა მზერას, და მის გაქვავებულ თვალებში სასოწარკვეთა გაიელვებდა ხოლმე.
სახტად დარჩენილი ჯიმი რეი ყოველივე ამას გაოგნებული სახით ადევნებდა თვალყურს. საბოლოოდ, „დაიკომ“ სვანი ლექსო გვერდზე გაიყვანა და დამარცვლით აუწყა: “I will fucking kill you.”[2] ამასობაში დაიწყო სიმღერა Satisfaction.[3] ამ სიტყვის გაგონებაზე სვანი ლექსო მთლად გახელდა. ამდენი ინგლისური კი ესმოდა. ერთი კი თქვა, „მე შენ გიჩვენებ ქილერსო“ და, დიონისო-ეროსის მიერ წაქეზებული და როლინგსტოუნფრთაშესხმული, იქვე შეუდგა წარმართი ღმერთების დავალების შესრულებას. მის ვიკინგ სატრფოს წინააღმდეგობის გაწევის დიდი სურვილი არ გამოუჩენია.
ერთი სიტყვით, ყველაფერი იმით დამთავრდა, რომ, „როლინგ სტოუნზის“ კდემამოსილი თაყვანისმცემლების დაჟინებული მოთხოვნით, მიჯნურთა გაურკვეველი ლაბირინთის ოთხეული პოლიციამ სამაგალითოდ გააძევა სტადიონის ტერიტორიიდან. ფონად ამ პროცესიას მიჰყვებოდა მრავლისმეტყველი და ბრძნულ-ეპოქალური: “You can’t always get what you want.”[4]
[1]Dike - დამამცირებელი ტერმინი, რომელიც გამოიყენება დომინანტი ლესბოსელის აღსანიშნავად.
[2](ინგლ. დაახლ.)„დაგასამარებ!“
[3](ინგლ.) დაახლოებით:
„ვინ არს იგი, ვის თვის გული ერთხელ აევსოს,
და რაც მიეღოს ერთხელ ნატვრით, ისი ეკმაროს?“
[4](ინგლ.) დაახლოებით: „კოკა წყალს ყოველთვის ვერ მოიტანსო.“