კონკურსი „გახდი ბესტსელერის ავტორი“
მკითხველის რჩეული
შორენა ხუხუას „შემოვალ ეტლით“ მნიშვნელოვანი ნაწარმოებია არა იმიტომ, რომ ეს თემა არის მოწყვლად ჯგუფზე, არა იმიტომ, რომ ეს არის ის, რამაც შეიძლება გულისტკივილი და თანაგრძნობა გამოიწვიოს, არამედ იმიტომ, რომ ეს არის მაღალმხატვრული ნაწარმოები, რომელშიც ნაჩვენებია, რომ სიყვარულს არ აქვს საზღვარი და სიყვარულის საზღვარი, მათ შორის, არც ეტლზე გადის. ეს არის ნამდვილი ლიტერატურა და გამარჯვება ნამდვილი ლიტერატურისა, როდესაც მასალამ ვერ დათრგუნა მთავარი სათქმელი. კარგია, რომ ავტორი იცნობს ამ სფეროს, იცის დეტალები, რაც ძალიან კარგად ჩანს, მაგრამ მთავარია, რომ მასში არის ძალა სიყვარულისა და ძალა იმისა, რომ პრეტენზიები არის სამყაროს მიმართ ზუსტად ისეთი, როგორიც შეიძლება ჰქონდეს ნებისმიერ ადამიანს. ჩემი ნება რომ იყოს, ამ ნაწარმოებს მივაყოლებდი ბარათაშვილის სიტყვებს, რომ „სილამაზეა ნიჭი მხოლოდ ხორციელების და, ვით ყვავილი, თავის დროზე მსწრაფლად დაჭკნების“ და დარჩება მარტო ის, რაც არის სულიერი სიყვარული.
ლევან ბერძენიშვილი
ლიტერატორი, კონკურსის ჟიურის წევრი
რამდენიმე ნაწარმოები შემომთავაზეს, გადავიკითხე და ძალიან ბევრი არ მიფიქრია, ისე ავირჩიე შორენა ხუხუას „შემოვალ ეტლით“. ეს ჩემთვის ძალიან ახლობელი თემაა, მე ვმეგობრობ შეზღუდული შესაძლებლობების მქონე ადამიანების ფართო სპექტრთან, არა მხოლოდ ეტლიანებთან. ჩემთვის ძალიან ბევრი ნიუანსი იყო ახლობელი, ნაცნობი. ძალიან კარგი ენით ჰყვება, გამართულია ლიტერატურულად, აზრობრივად, ემოციურად... თითქოს არც სიმძიმეა და არც ტრაგიზმი, ამავდროულად, ყველაფერია ერთად. თავიდანვე მივხვდი, რომ დიდი სიამოვნებით გავაკეთებდი ამ ნაწარმოების ყდას. თუმცა, საბოლოოდ, ეს იყო ბევრი ფიქრისა და მიგნების შედეგი.
მაკა ჩიჩუა
მხატვარი, ყდის ილუსტრატორი
ძალიან გულწრფელი წიგნია. მთავარი გმირის ფიქრი, განცდა, ქცევა იმდენად გულწრფელია და დამაჯერებელი, სულ მეგონა ავტობიოგრაფიულ და დოკუმენტურ ტექსტს ვკითხულობდი. ავტორი იმდენად კარგად ახერხებს რამდენიმე პრობლემატური თემის გაშლას, განვრცობას, მკითხველის დაფიქრებას, გმირის ტყავში შეყვანას, მელოდრამატული სიუჟეტის სოციალურ დრამაში გადაყვანას, ადამიანური განცდების აღწერას და პერსონაჟების ხასიათების გახსნას...
ჩვენს საზოგადოებას სჭირდება ამ თემებზე ასე წერა, ფიქრი და რეფლექსია და ვფიქრობ, რომ ამ რომანს უნდა ჰქონდეს პრეტენზია ბესტსელერობაზე.
თეონა დოლენჯაშვილი
მწერალი, შორენა ხუხუას მენტორი
ჩუქება
